بعد حصول اللاجىء على حق الإقامة في السويد تقوم الدولة بإعداده لدخول ما يسمى بخطة الترسيخ (konsolideringsplan) 
و هي خطة إندماج محدودة بمدة زمنية (سنتين) و يمنح فيها المقيم التالي : 
1- إغلاق ملفه من دائرة الهجرة Migrationsverket و تحويله إلى مكتب العمل Arbetsförmedlingen الذي تكون مهمته بشكل نظري هي مساعدة المقيم على الحصول على عمل وفق مؤهلاته العلمية أو تأهيله للحصول على فرصة عمل 
2- تسجيله في السجل المدني و حصوله على رقم وطني سويدي يمنحه أغلب حقوق المواطن السويدي ما عدا الإنتخابات و تفاصيل أخرى 
3- الحصول على دورة تعليم اللغة السويدية SFI بمستوياتها الأربعة ABCD و يتم إدخال الجامعيين إلى المستوى C مباشرةً و تليها دورة محو الأمية في اللغة السويدية دورة إتقان اللغة السويدية SAS1 SAS2 SAS3 و هذه الدورات اللغوية بكافة مستوياتها محدودة بمدة خطة الترسيخ . 
4- مقابل الإلتزام بالدوام على دورة اللغة يقوم مكتب العمل بتوجيه دائرة الضرائب Försäkringskassan على منح المقيم راتب شهري يقدر ب 6700 كرون سويدي بدلاً تعادل تقريباً 1000$ من 2000 كرون سويدي تقريباً تعادل 300$ يحصل عليها طالب اللجوء من دائرة الهجرة . 
5- من عدا الراتب الشهري تقوم دائرة الضرائب أيضاً بمنح ما يسمى مساعدة السكن و هو دفع تقريباً 75% من أجار البيت الذي تسكن فيه , حيث تخصص سقف 5800 كرون سويدي كمبلغ إعانة .. يدفع المقيم ما يزيد عنه من راتبه الشخصي في حال كان أجار البيت أعلى من هذا المبلغ . و يوجد نقطة متعلقة بدفع 1800 كرون سأقوم بتوضيحها لاحقاً . 
6- تعيين LOTS و هو شخص سويدي (مواطن أو مقيم) المهم أقدم منك يسكن في نفس البلدية التي تسكن فيها و يكون يتحدث السويدية بشكل ممتاز و لديه خبرة في المعاملات الرسمية و أمور الحياة في السويد و مهمته أن يساعدك على الإندماج في المجتمع و البحث عن منزل .. يرتبط غالباً بشركات تنظم عمله و يتقاضى تقريباً ما يعادل راتب المقيم حوالي 5500 كرون سويدي تدفع من قبل مصلحة الضرائب أيضاً . 
هلأ الحكي فوق كتير حلو .. و كالعادة رح ينط كتيرين يتهموني أني عم لمّع صورة السويد أو أني مندوب سياحة عند الدولة و عم شجع الهجرة ! 
(هبوووووا) بس الفكرة مو هيك أبداً !!! شايفين خطة الترسيخ ببنودها الـ 6 الحلوة كتير ؟! هي ما بتبلش إلا لما بيطلع الواحد من سكن الهجرة إلى عنوان مغاير .. 
يعني يسلم غرفته بالكامب أو سكن الهجرة التابع إلى Migrationsverket و بدون هيك .. ما في خطة ترسيخ ! و بيضل المقيم في الكامب و راتبه و حالته كلون على حطة أيدك أكل و نوم فقط لبين ما يدخل خطة الترسيخ ! و هادة كلو بسبب قرار صدر في 1-4-2014 ألزم كل طالب لجوء حصل على الإقامة أنو ما يبلش خطة ترسيخ إلا لما يطلع من سكن الكامب .. لأنو السوريين الحرابيق اللي قبل هل قرار (فئة مو الأغلبية) بلشوا دورة لغة + راتب جيد + ساكن بالكامب .. حلو و ظريف و كلو سوريين و تدفئة و و و بياكل و بشرب و بدفع للهجرة 500 كرون عن استعصاءه في الغرفة و بصمّد أكتر من نص راتبه لبين ما تصل عيلتو لعندو .. لأنو معاملة لم الشمل بتطول حوالي من 6 أشهر إلى السنة ! 
هاد الشي خلق عدم توفر أماكن في الكامبات على الوافدين الجدد لأنو حضرة جناب السوري ملزّق و عاجبو الوضع و ما بدو يطلع .. 
بالتالي الهجرة كانت مضطرة تعمل هيك ! هلق استعصاء اللاجىء في الكامب فعلياً ما عم يوفر فوق الـ 1300 كرون ! حوالي الـ 150$ ليش لأنو وقت رح يطلع على بيت برا سكن الهجرة رح تدفعله الدولة أجاره لو أخدو رخيص .. 
يعني مو ضروري ياخدو فوق الـ 5800 و بدفعوه من راتبو 1800 كرون هي إجباري .. ضريبة عن مساعدة السكن من الراتب هي رح تدفعها لو أجار بيت 5800 أو 4000 .. 
طالما في مساعدة سكن لازم تدفع 1800 من الـ 6700 اللي عم تجيك كل شهر . 
طيب منين أجت الـ 1300 اللي عم يوفرها حضرة اللاجىء ؟ الجواب أنو هية عم تجي من اقتطاع مبلغ 500 كرون بصير يدفعها اللاجىء بعد حصوله على الإقامة في حال ضل بالكامب أو سكن الهجرة يعني بحسبة بسيطة 1800 - 500 = 1300 كرون فقط ما يوفره السوري الذي يرغب في البقاء في الكامب بعد الحصول على الإقامة 
المشكلة وين ؟ هاد القرار .. دخل الوافدين الجدد بعد 1-4-2014 و اللي منتظرين فرصتون بتعلم اللغة ثم العمل و الإندماج الفعلي في هل بلد بمتاهة طبعاً الحكي عن اللي جاية يبني مستقبلو و يشوف نفسو هون , مو بس اللي جاية (ياخود راتب عن مرتو و عر عرير الأولاد اللي جابون بلم الشمل و ما يتعلم لغة و يخليهم يصرفو عليه إلى ما شاء الله) 
كيف ؟ رح أحكي عن المتاهة .. و هلق حطو فنجان القهوة جمبكون .. لأنو الحكي خيلة رح يكون . 
اتفقنا أنو مافي خطة ترسيخ بعد الحصول على الإقامة بدون ما الواحد يطلع من سكن الهجرة صح ؟ طيب حتى أطلع من سكن الهجرة و ما نام بالشارع لازم أكون أستأجرت بيت ! حتى أستأجر بيت ما لازم ينصدم الحاصل على الإقامة (بالشروط التعجيزية لشركات السكن و صاحبي البيوت) في التأجير للأجانب .. 
و هون كنت واضح جداً في التعبير لأنو غلطان اللي بقول في أزمة سكن بالسويد و ما في بيوت .. هىء .. البيوت كتيرة .. دخول عالنت و شوف .. بس الشروط .. و هون الحكي . 
هلا أول شرط بحطوه هوة الدخل الشهري الثابت Income Salary و هاد ببين معون في كشف حساب البنك تبعك .. 
لكن لحظة هاد مو الرصيد ها .. في واحد من رفقاتي حط مبلغ كبير على حسبتو أنو بدو يغري شركات السكن يوافقولو على شي بيت من اللي أعجب فيون لكن عالفاضي .. الـ Income Salary أو الراتب الوارد هو الدخل الثابت اللي بتمنحك ياه جهة معينة عم تشتغل عندها أو عاملة عليك رعاية لمدة زمنية محددة . 
يعني يا أما شغل و هاد شبه مستحيل قبل دورة اللغة (ياللي ما رح تحصل عليها بدون خطة الترسيخ) أو عن طريق الدعم اللي عم تأمنه مصلحة الضرائب ( و كمان هاد ما رح تحصل عليها بدون خطة الترسيخ) ! ! 
يعني .. مصلحة الضرائب ما بتعطيك الـ 6700 راتبك + الـ 5800 مساعدة السكن بدون ما تكون داخل خطة ترسيخ ! أية ؟! 
و مصلحة الهجرة ما بتدخلك ترسيخ لتطلع من عندون على بيت .. و بيت ما رح تلاقي إلا بطلوع الروح بدون دخل ثابت من خطة الترسيخ >_< 
بالتالي الوضع كتير صاير صعب و محبط عند كتيرين برأيي أنظلموا بسبب قرار 1-4-2014 اللي كان سببه أبناء جلدتنا اللي أجوا قبلنا .. 
و رح يتسببوا بقرارات لسع أقسى من هيك بعد السمعات اللي عم نسمعها و التي يندى لها الجبين حقاً .