عن تجربة شخصية حبيت أشارك السوريين الي بتركيا و الي برا تركيا خطوات عن طريقة الدخول و نظام الدور المتبع بالنسبة للجوازات و التصديقات في محاولة لتوفير الوقت و الجهد و التعب:

- حاول تتواجد بأبكر وقت ممكن أمام المسجد الي جنب القنصلية و سجل أسمك في حال كان في حدى من الشباب المتواجدين فتح ورقة و ابتدا التسجيل أما اذا كنت أنت أول واحد فأنت افتاح ورقة تسجيل و ابدأ تسجيل الأسماء بالعربي و جنبها بالإنكليزي متل الجواز بحسب معاملتك فمثلاً (تجديد و تمديد الجوازات - سند إقامة - وكالات - أحوال مدنية - و أي شي بيتعلق بالطلاب) هاد دور لحالو أما باقي التصديقات بشكل عام فهي بدور تاني ويفضل انو كل دور يكون بورقة منفصلة.
- بتنتظر قدوم موظفين القنصلية على ساحة الجامع و بتم تسليمن الورقة و هالشي بكون حوالي الساعة تسعة الصبح بيجي موظفين واحد سوري و التاني تركي اذا كانت شغلتك عند السوري فهو متعاون كتير و قدم ما سألتو ما بيمل أما إذا كانت عند التركي و الي هو بالأغلب مستلم دور التصديقات فالله يعينك لأنو معاملتو سيئة جداً.
- بيسألوا ان كان الجميع متوافق عالورقة و رضيانين بالدور المكتوب فيا و اذا قالو لا رح يتم تخزيق الورقة و تصير القصة شوربة.
- اذا قال الكل موافق عالدور المكتوب بالورقة رح يبلشوا توزيع أوراق دور مرقمة كل واحد بحسب نوع معاملتو بس بمعظم الأحيان ما بتم توزيع إلا 15 رقم من الدورين مشان هيك ضروري كتير تجي بكير أنا كنت الساعة 3.30 الصبح عباب الجامع وابتديت تسجيل الدور وكان رقمي 2.
- بعد ما تاخد ورقة الدور بتروح لباب القنصلية و بتستنى دورك هنيك طبعا حتى لو كان رقمك 1 بتتأخر بالدخلة لأنو لازم تستنى الواسطات ليخلصو بعدا بيجي دورك.
- بس دخلت و طلعت عالقنصلية أمورك كلا بتمشي ببساطة و سهولة بتسلم وراقك للتصديق و بقلك تعا الساعة 5 استلمن أما اذا كان موضوعك تمديد جواز السفر بتعطي جوازك بقلك كم سنة اجاك التمديد و بتعبي 4 أوراق فيها معلومات كاملة عنك و بتعطي 6 صور شخصية مع الجواز.
- أصحاب دور الجوازات اذا كان عنوانك من غير مدينة اسطنبول متل عنتاب و مرسين فرح تستلم معاملتك بنفس اليوم أما اذا كنت من اسطنبول فرح يقلك عبي هدول الأوراق و تعا بالتاريخ و الوقت المكتوب عليهن.
- مجرد ما يقلك الموظف روح ادفاع بالبنك فهاد الشي يعني رح تستلم معاملتك بنفس اليوم البنك، تحت القنصلية بيعطيك ورقة فيها قيمة المبلغ الي لازم تدفعو انت بتعطي الورقة لموظف البنك مع المبلغ و بيعطيك 3 نسخ من ايصال القبض.
- بترجع عالقنصلية و بتعطي للموظف ايصال الدفع و بقلك موعد استلام الجواز أو التصديق.
- بالنسبة لكلفة الدفع بالبنك اذا مخلص جيش فالتمديد رح يجيك 4 سنين عالأغلب بكلفة 400 دولار على ما اذكر أما اذا عليك جيش و حتى لو متخلف فرح يجيك تمديد 2 سنة  و المبلغ اللازم تدفعو 20 دولار بالإضافة لـ 10 ليرة تركي عمولة البنك.
- إذا كنت جاية تقدم لسا عالتمديد فالموضوع كلو ما بكلفك ولا ليرة و مافي داعي للدور ولا حتى أنك تجي شخصياً أي حدى باسطنبول بأوقات دوام القنصلية بيجيب فورم التمديد من باب مبنى القنصلية و بعبي و بسلمو للسيكيورتي و بس و بيستنى 3 أشهر  على الأقل.
هاد ملخص عن معاناة الدخول للقنصلية و أكيد مافي نظام ثابت عبيتشغلوا فيه، هي شوية معلومات حاولت أساعد فيا السوريين هي مالها معلومات كاملة بس هي تجربة بتمنى تستفيدوا منها.