في البداية حصلت على جواز سفر سويدي بيشبهني بنسبة ٨٠ ٪ وبعدا ختمته ختم دخول لتركيا.
عقدت العزم اني سافر وحجزت قبل بيومين تذكرة مباشرة على الطيران التركي , جهزت حالي بطريقة مستحيل انكشف فيها و عملت كل الاجراءات اللازمة من اخفاء لاوراقي السورية وتعلمت الكثير من الجمل السويدية حتى اني نسخت صور لبعض البيوت والشوارع والأبنية بالسويد "مالمو" لموبايلي وحطيت السماعات باذني والشنتاية على ظهري..
كانت رحلتي الساعة ٩المسا , وصلت عالمطار قبل بساعتين وبعد أول مرحلة تفتيش للغراض صرت بقلب المطار.
رحلتي عند البوابة A هنيك رحت عالجهاز تبع البوردينغ باس.. وحطيت جوازي بقلب الجهاز طلعت معلومات الحجز تبعي عالشاشة مشيت بالخطوات لحتى طلعتلي بطاقة البوردينغ أخدتها وتوجهت عالباسبورت كونترول لحتى يختمولي دخول.
وقفت بالدور مع هالعالم الكثيرة ونقيت أسهل مكتب. كان عم يحط الختم بدون ما يدقق كتيرعالناس.
وصل دوري وعطيتو الجواز وانا طبيعي جداً وفعلاً ختملي وقلي فوت.. فتت عالسوق الحرة ورديت رحت لعند الشاشات لأعرف وين البوابة الخاصة برحلة السويد.. كانت البوابة "210" مشيت لوصلت عالبوابة وطبعاً كل بوابة في عندها كراسي للإنتظار وشاشة للوقت.. قعدت بين هالناس واستنيت كانت أغلب الناس عرب و في من الهند وفي كم شخص من السويد بس قلال طبعاً هاد الشي بيساعدني كتير مشان ما يشكو فيني.
المهم صارت الساعة الثامنة والنصف بلشو ينادو للناس وقف موظف وموظفة على مدخل البوابة وبلشو يشيكو على الجوازات ويطلعو بأصحابها مشان يكشفو اذا في شبيه أو مزور انا كنت بالصف يلي عند الموظفة وفعلاً وصلت لعندها وعطيتها الجواز وطلعت فيني وبالجواز وما شكت انو أنا غير صاحب هالجواز.
ومرقت على خير وضليت ماشي لوصلت عالطيارة.. ضليت قاعد شي ثلث ساعة والامور طبيعية ما لقيت غير ٣ رجال أمن طلبو من أحد الركاب جوازو واجو لعندي مباشرة وقالولي عطينا جوازك والبوردينغ.. وفعلاً طالعت جوازي قلي اتفضل معنا.. طلعت معهون لخارج الطيارة.. قلي وين جوازك الأصلي ..قلتلو شو قصدك ؟ قلي انت سوري ؟ قلتلو لا قلتلو انا من السويد.. قلي اتفضل معنا وأخدوني على قسم أمن المطار وقلي استنى هون شوي.. ورد سألني انت من وين وهاد الجواز لمين حتى سألني بالسويدي جملة من الجمل يلي تعلمتها وجاوبتو الجواب الصحيح بالسويدي "سألني وين عايش" وسألني عن رقم الجواز وجاوبتو كمان بالسويدي.. فات ورجع لعندي وأخد صورة لوشي وبعتها مباشرة للبوليس السويدي وكانو عم يتواصلو مع بعض.
كانو يلي معي أربع موظفين.. اخدوني على الاستراحة وقعدو هنن على طاولة وانا على طاولة حكو شوي وبعدين اجو لعندي.. سألني الرئيس تبعهون مرة تانية وين بسبورك الأصلي قلتلو شو المشكلة.. قلي انو هاد الجواز مو جوازك والأمر بالتوقيف والتدقيق اجا من السويد مو من عنا.. خبرتهون هون اني سوري أنا ما شفت معاملة سيئة من أمن المطار.. و صارو يقدمولي حلول لمشكلتي وقلالولي انو حاول تجرب تحصل على فيزة شنغن من سفارة اليونان بتركيا لانهون عم يعطو أحياناً للسوريين او حاول تسافر من اليونان بس أرجوك لا تحاول من عنا لانو رح يصير فيك متل ما صار هلأ ورح تنسرق مصاريك وحتى فترة الأربع ساعات يلي سمعت انهون عم يحجزو فيها السوري ما صارت.
ما خلوني أكتر من نص ساعة وقالولي هلأ رح يجي واحد من الأمن ويسألك عن وثائقك السورية ونحنا ما بدنا يحطو معلوماتك عندهون وساعدوني مشان اطلع من المطار بدون ما يعرفو عني الأمن حتى اسمي وما بصموني وقلي هلأ رح ترجع تفوت على اسطنبول بشكل رسمي بدون أي مشاكل.. وقلتلهون بدي جوازي الشبيه قلي ليكو بجيبتي وهلأ بس نصل لبرا رح أعطيك يا.. وفعلاً وصلت لبرا عطاني الجواز السويدي تركتهون رجعت طبعاً البوردينغ والجواز ختمو عليهون ختم إبطال عالجواز كان الختم بنفس الصفحة يلي مختوم عليها ختم الدخول على تركيا.. يلي مو متأكد انو جوازو ساري مفعولو بالسويد ومو مبلغ علي لا يحاول ولا يفكر انو يطلع مباشر من تركيا طيران..
حتى انو لازم يتأكد انو الجواز مسجل تسجيل خروج بالسويد عم يدققو بالسويد عن هالشي.. وأي رحلة مباشرة من هون للسويد قبل انطلاق الطيارة الأمن السويدي عم تصل لعندن قائمة بكل الحجوزات والجوازات وأرقامها لعندهون وعم يعطو التصريح بالطيران على أساس هالشي..
هلأ قصة اليونان :

بعد ما انكمشت وطالعوني برا الطيارة عرفت هون انو الظاهر ما الي غير طريق البحر.. زبطت مع مهرب موجود عطول بازمير.. الزلمة ما اخد مني حتى بعد وصولي لليونان وامنت عندو جوازي وهويتي السويدية وبعتلي ياهون شحن.. كان الاتفاق عاساس طلعة بيخت رحنا عازمير وبلش المهرب الاساسي ياجلنا يوم وتنين لحد اليوم التالت.. ربطلنا مع مهرب تاني لنطلع ببلم بنفس اليوم... البلم هو افضل طريقة للسفر بالبحر لعدة اسباب منها انو هاد هوا مو معدن يعني لو قلب بيضل فايش متل كانو مو قالب اما اليخت اذا قلب رح يغرقو الناس و البلم منخفض كتير على وش المي فبيلزق بالبحر لزق وحتى لو الموج عالي ما بيصرلو شي و رخيص وبتنسى تدفع فوق 1000 يورو لليونان.. ويلي بيقلك اكتر من الف بيكون نصاب.. مدة الرحلة لجزيرة خيوس من النقطة يلي انطلقنا منها كانت بحدود الساعة واربعين دقيقة..و كمشنا خفر السواحل اليوناني قبل ما نصل للجزيرة بشي ربع ساعة بدن نرجع لتركيا قمنا طفينا المحرك قدام الجزيرة وماعاد ردينا عليهون فتحت موبايلي واخدت الاحداثيات تبع موقعنا من ال الجي بي اس واتصلت بال يو إن وبخفر السواحل تبع اثينا وبخفر السواحل تبع الجزيرة نفسهون وقلتلون في عالم عم تقوص رصاص بالهوا وتخوفنا وبدهون يرجعونا لتركيا ونحنا معنا اطفال و نسوان.. استنفرو كلهون اجا قارب تاني من الخفر وطالعونا لعندهون واخدونا عالجزيرة وضلينا بالكامب تبع الجزيرة 11 يوم وفي عالم قبلنا طولت اكتر من هيك والكامب تبع هالجزيرة عبارة عن كابوس وسخ ومرض.. ومعاملة اقل من عادية واحيانا سيئة.. بس بالاخير رح تطلع.. كامب جزيرة ميتليني احسن بكتير.. طبعا طول فترة الكامب ممنوع يكون معك موبايلك او اي جهاز جوا وبياخدوهون منك لتطلع بيرجعولك ياهون.. طلعنا منها عاثينا وهنيك استاجرنا بيت ب 50 يورو عالشخص بالشهر.. وربطو الشباب يلي معي مع مهرب هاد بيطالعك عفرنسا او ايطاليا او المانيا ب 4500 يورو وبيراعيك اذا بتحكي معو.. بيضل بيجرب من اليونان بهويات و وراق لتسافر.. والتامين بمكتب باثينا.. بس انتو حددو مدة بس تربطو المصاري عاسمو.. مشان ما يطول وهو عم يحاول فيكون ومشان اذا فشلت اول مرة دغري يحاول فيكون مرة تانية.. يعني حددوها من اسبوع لعشر ايام.. بلش يحاول بالشباب واحد يطلع والباقي ينكمش.. صار مطالع تنين من الشباب وبقي 3.. انا كان معي جوازي السويدي الشبيه.. رحت قطعت لحالي من اثينا لباريس مباشر وحجزت عن طريق الانترنت التيكت كلفتني 300 يورو لانو كنت عم احجز بنفس اليوم.. لو قبل بيومين بتكون ارخص.. ورحت عالمطار ومن اول محاولة فتت وركبت.. وصلت عباريس مطار orly ما لقيت غير 4 ضباط عم يستنو بالكاليدور رحلة اليونان ووقفو تنين عاليمين وتنيم عالشمال وشييكو الناس كلها وصل دوري قلي الباسبور عطيتو يا ضل يطلع فيني وبالباسبور ويقلبو ويرفعو وينزلو لمدة شي 15 ثانية بعدين عطاني يا وقلي شكرا.. وكملت برا المطار ولزق فيني زبال هاد بيكون غالبا عربي وهدول مخابرات وبيفسدو عن الناس. وشافني قدام موقف الباص لحالي وعم احكي عالموبايل ركد لناحي بمكنستو وبلش يلحقني.. بلشت احكي عالموبايل انجليزي وزورتو بعيني مشان يفهم وحسستو اني ادايقت منو تركني وكمل طريقو.. رحت عاوتيل كان 3 نجوم ب 100 يورو.. تاني يوم رحت مباشرة عمطار سارل دي غول لاحجز عالخطوط الفرنسية من باريس لغوتنبورغ مباشرة حجزت الساعة 12 الضهر وكانت رحلتي 7:30 المسا.. حق التيكت 600 يورو.. قالتلي تبع الحجز انو روح عميل تشيك ان وخود البوردينع باس لبين ما يجي وقت رحلتك ساعتها بوشك عالطيارة بدون ما تعمل نشيك المسا.. قلتلها اوك وحملت حالي عمكان التشيك ان ولقيت في واحد واقف قلتلو بدي اعمل تشيك ان.. قلي فيك عن طريق هالجهاز او عن طريق الموظفة.. قلتلو لا رح روح عالموظفة لانو بيجوز يكون ابتعادي عن الموظفة يخليهون يشكو فيني.. فرحت عالموظفة واول ما عطيتها الجواز ضلت تطلع فيني وبالجواز اكتر من خمس مرات.. شفتها كبست شوي عالكومبيوتر وبعدين عطتني البوردينغ باس.. غلطت نفس غلطة  تركيا وحجزت مباشر للسويد والجواز مبلغ عنو بالسويد!! .. وانا كنت متاكد انو اخدت رقم الجواز وكانو رح يشيكو مع الكونترول السويدي.. كل العالم تدفشني و تقلي طلاع وانا قلبي ما كان مرتاح وكنت عرفان حالي مية بالمية رح انكمش.. رحت عمكتب الطيران بالمطار وقلتلهون لو سمحتو بدي الغي البطاقة قالتلي ماشي رجعولي كل المصاري.. رحت عمحطة القطار وحجزت من باريس لهامبورغ قطار مسائي مع منامة ب 170 يورو وما طلبو اي هوية او جواز ومن هامبورغ كمان لكوبنهاغن قطار ب 85 يورو.. ومن كوبنهاغن لستوكهولم ب 50 يورو تقريبا وكلو بدون ما يطلبو اي اثبات بس مصاري و ما كان في ولا كونترول عالطريق من باريس لستوكهولم ما حدا شيكنا طبعا بس يمشي القطار من كوبنهاغن.. ربع ساعة بتصيرو بمالمو بالسويد.. انا كملت عستوكهولم وسلمت حالي وهي كل قصتي..السفرة كلفتني بالقطارات بحدود ال 350 يورو وانا مشتري جواز سويدي ب2000 دولار و 1000 يورو من ازمير لليونان بالبحر وتيكت طيارة ب 300 يورو من اثينا لفرنسا.

شبكة غربتنا