حكايتي ببساطة إني نويت عدل وضعي القانوني بتركيا وأعمل خروج ودخول وادفع الغرامة وفعلاً ساألت كتيير ناس عالسفر إلى قبرص وقالولي عميل حجز فندقي وخود ذهاب وإياب.
ومن دون تأخير حجزت بفندق بقبرص وحجزت ذهاب وإياب وأخدت معي 1000 دولار وطلعت عمطار أتاتورك بالموعد ورحت دفعت الغرامة 375 ليرة وتبع الصندوق أكل عليي 10 ليرات مدري ليش.. وبعدها ختمت خروج وطلعت بالطيارة نظامي والفلم ببلش وقت بوصل عمطار ايرجان.. أول ما وصلت اخترت موظف باين عليه إنو حباب (هيك عأساس) واستنيت لحتى خلصو الكل من عندو وبعدا رجعت لعندو وعاساس الانكليزي شغال ..وابن الحرام هوي عرفني سوري خمر واخضر وأخد جوازي وأخدني عالضابط اللي وجهز بيقطع الرزق.
طالعت للضابط كرت الإياب والحجز الفندقي زتن بوجهي وقلي مافي شي بساعدك وسجلي بالضبط اني جاي لأهرب عالقسم اليوناني وجابولي الشنطة وذتوني بالحجز ..وطبعاً الحجز ذل بذل لا أكل ومي وسخة وحمام بقرف ومافيه مي أبداً وفيه تخوت بس أنا فضلت مانام أحسنلي من هالتخوت المقرفة ومعهي أشكال ألوان جنسيات وناس .. كانت معاملة السجاب بتقرف الدخان أخدو الموبايل أخدو وما يرضى يسمعني .
كان إلي أصدقائي عندن اقامات بقبرص عرفتو بقصتي وعملو المستحيل وما طلع بإيدن شي..والفكرة اني شفت شباب سورية بالحجز حاولو كتير قبلي وما استفادو..المهم مووووت أسود هالحجز..كانت طيارتي االإياب بعد يومين دفعت 100 ليرة رشوة للسجان ليحجزلي عأقرب طيارة عاسطنبول وفعلاً حجزلي وقضيت بالحجز أقل من 24 ساعة من الموت وكنت عرفان اني كل شي عملتو عالفاضي وما استفدت شي ..
ووقت وصلت عمطار أتاتورك كانت حالتي بتبكي بلا أكل وبلا نوم ويأسان فاخترت اني روح فوراً عالبوليس واحكيلن ووقت وصلت للضابط المناوب قام لعندي وقعدني ويقلي لاتخاف انتي بأمان وهون بلدك وشربني مي وهون اتذكرت المتل اللي بقول ما بتعرف خيرو لتجرب غيرو.. الضابط أخد أقوالي كلها وكل شي صار معي.
بعدها قلي إنتي بدك تاخد اقامة سياحية قلتلو اي راح ختملي الجواز و عطاني ورقة مخاطبة للأمنيات ولازم راجع الأمنيات خلال عشر أيام.. حاصل الكلام نصيحة أخ ما حدا يطلع عقبرص لأنو هنيك بهدلة وذل..والله ييسر للجميع.