أنا كنت بالسفارة السورية بالبحرين الأسبوع هادا لتمديد الجواز.. الوضع على النحو التالي:
1- لازم تحجز موعد عن طريق النت , الموظف من عالباب معه قائمة باسماء اللي حاجزين .. يا أما تطبع صورة الحجز أو على الأقل تحفظ رقم الحجز لأنو رح يسألك عنو و يقارنو بالقائمة اللي عندو . .
2- بالنسبة لتمديد الجواز .. الجواز يمدد لمدة اقصاها عشر سنين بشرط وجود مكان للتمديد في صفحة التمديدات
يعني على فرض معك جوزا مدته ست سنين ( اصدار سنتين واتمدد مرتين كل مره سنتين ) هادا ما بتمدد ولازم جواز جديد لأنو مافي مكان للتمديد في الصفحه
شغلة تانية .. العشر سنين تحسب من تاريخ اصدار الجواز .. لو جوازك اصدار 2004 مثلا .. ولسا فيو مكان بصفحة التمديد .. لا يمدد ولازم جواز جديد لأنو فعليا يعتبر انتهى بسنه 2014
الجواز الجديد بيبعتوه عالشام وبياخد بين 5 و 6 شهور
التمديد بياخد شهر
المطلوب للتمديد .. صورة الجواز والاقامه السعودية وصورتين شخصية و تعبئه الاستماره
احسب حسابك تصور الجواز والاقامه قبل ما تدخل لأنو جوا ما في تصوير ... الاستمارة اطبعها من موقع السفارة عالنت وعبيها قبل ما تروح مشان توفر ع حالك وعالناس وقت
الموظف رح يشوف الورق اللي معك ويعطيك وصل استلام ( بس مارح يستلم ولا شي ) وايصال تسديد بالبنك ( البنك الأهلي المتحد ) بتسدد وبترجع الساعة 2 الظهر وبتسلم الورق مع الايصال والجواز للموظف اللي على شباك 3
مكان البنك ... ورا السفارة في اسواق الجزيرة وستاربكس ... هو بعدهم ... اطلع باتجاه مشفى ابن النفيس لوقت ما تلاقي شارع مسارين .. لف عاليمين .. بتلاقي اشاره وبعدها اسواق الجزيره والبنك ... ( على فكرة في محل تصوير صور ومستندات جنب اسواق الجزيرة ازا احتجت )
في فروع اخرى للبنك بشارع المعارض مقابل التامينات وبشارع القصر وبالسيف
رسوم التمديد 76 دينار بحريني وممكن تدفعهم بالريال .. رح تطلع 760 ريال
الموظفين للآمانة كتير متعاونين وعم بمشو الناس ... الأمور سلسة ومافي زحمة متل أول ... بس البعض للأسف بدو يعمل زحمه وازعاج للكل ... كنا بحدود 20 - 25 شخص حاجزين ( الباقي مو حاجزين وما دخلوهن ... مابعرف ازا دخلو بعدين ولا لاء ) والناس عم تدفش مشان تدخل اول والموظف عم يقول والله اللي الو حجز ليدخل بس بالدور
انا كنت من اواخر الناس اللي دخلو ... بس لما وصلنا عالشباك نادوا اسمي اول واحد ... لأنو حسب الحجز الأبكر ... دخلت عالسفارة 8 ونص وطلعت 9 الا تلت ... والساعه 2 وقفتي وتسليم الورق ما ادخت نص ساعه
نصيحة : صور الاقامة السعودية والجواز وصورتين شخصية وعبي الاستماره وحطهن بملف واول ما ينادوا اسمك عطيهن الملف مشان ما تتخربط مع كتير الاوراق ... أنا كان عندي 3 جوازات فحطيت كل معامله بملف