التسجيل بجامعة غازي عينتاب
اولا : بالنسبة لتقديم طلبات التكميل للجامعة
كمان تم السؤال عن هي الفقرة لعميد احدى الكليات وكانت الإجابة جيب كشف العلامات وتوصيف مواد وشهادة توفل وأنا بقبلك ورح يفتحو التقديم للتكميل أول ما ينزل قرار من الجامعة وهادا تقريبا بيكون مع طلبات الماجستير طبعا في نوعين من القبول للتكميل في كطالب عادي وهادا ووقت بيتخرج بياخد شهادة نظامية من الجامعة أما كطالب ضيف فهادا بياخد كشف علامات وقت التخرج وبالنسبة لطلاب سنة التخرج للي بدن ينقلو هدول ما فينن يكملو بالجامعة هادا قانون بالجامعة
ثانيا : بالنسبة للأوراق المطلوبة للتسجيل كمستجد
1 -صورة عن شهادة البكلوريا مترجمة ومصدقة من النوتر ومعدلة من عند التربية أما يلي شهادتو سعودية أو شي دولة تاني فهادا لازم يراجع السفارة التركية يلي ببلدو ويطلب تعديل موادو وإذا كان هون بتركيا فينو ينزل عالتربية ويعدلا بس بدا اقامه أو عقد اجار 
2- صور شخصية
3- وصل تسجيل بمبلغ 100 ليرة تركية ( 50 دولار ) هادا يالجامعة بتدفعو وقت التقديم للمفاضلة
4- صورة عن جواز السفر أو بطاقة لاجئ 
ثالثا : بالنسبة للأوراق المطلوبة لتقديم الإستكمال بالجامعة 
صورة عن كشف العلامات وتوصيف المواد مترجمين وومصدقين من النوتر 
وصورة عن شهادة البكلوريا مترجمة ومصدقه من النوتر 
وصورة عن جواز السفر أو بطاقة لاجئ
رابعا : لغة التدريس بالجامعة
أغلب فروع الهندسات هون التدريس فيا باللغة الإنجليزية واغلب المعاهد هون بتدرس باللغه التركية وبالنسبة للطب يوجد التدريس باللغتين الإنجليزية والتركية بس بعتقد اللغه التركية مخصصه بس للأتراك 
خامسا : بالنسبة لطريقة التقديم للمفاضلة 
يتم تعبئة البيانات على النت وإرسال المعلومات من هادا الموقع
http://gul3.bim.gantep.edu.tr/~applicationform/ 
وبعدين بتحمل الورقة من الإنترنت ويتم عمل 3 نسخ من الورقة وبتسجلو الرغبات بنفس الترتيب بكل ورقة طبعا مسموح لك بس 3 رغبات وبتروح لكل كلية سجلتا من ضمن الرغبات وبتقدم نسخه من الورقة للكلية مع صورة جواز السفر وصورة شهادة البكلوريا والصور الشخصية طبعا وقت بدكم تسجلو بالمفاضلة في نظامين صباحي ومسائي طبعا مو لكل الفروعة لهيك إذا بدك فترة معينة فينك تسجلها بالمفاضلة وهديك السنة أنا سجلت صباحي بس وقت القبول طلع لي مسائي لهيك مو شرط حتى لو كتبت الفترة يقبولك بنفس الفترة يلي بدك ياهاا
سادسا : بالنسبة لفحص اللغة ( المعافيات )
بعد صدور نتائج المفاضلة يتم تحديد موعد لفحص إعفاء من اللغة ( التركية أو الإنجليزية على حسب الفرع ) وطبعا للطالب يلي معو شهادة لغة توفل للغة الإنجليزية أو شهادة تومر للغة التركية مانو محتاج يفوت للفحص وبيتحول فورا للدراسة بالفرع يلي انقبل فيو أما بالنسبة للي ما معو شهادة لغة بيدخل الفحص ( الفحص عبارة عن 3 مراحل المرحلة الأولى هي لكل الطلاب عبارة عن اختيار من متعدد وويلي بينجح فيو بيتأهل للدخول للفحص التاني يلي هوي عبارة عن كتابة موضوع طبعا هدول الفحصين بيوم واحد واليوم التاني بيتم عمل فحص للي تأهلو بالفحص وبيكون عبارة عن فحص كتابي ( سماعي وقواعد ) وبعدا بكم يوم بتطلع نتائج هدول الفحوصة ) طبعا كل فرع وإلو نسبة معينة للإعفاء من سنة اللغة يلي بينجح بينعفى من سنة اللغة ويلي بيرسب بيضطر ياخد سنة لغة بالجامعة مع يلي ما اتأهلو طبعا ومن نسب الطلاب بيتحدد مستواك باللغة 
سابعا : بالنسبة للإعتراف بالشهادة الليبية وشهادة الإئتلاف
طبعا شهادة الإئتلاف مو معترف عليا ومشان الشهادة الليبية اليوم كنت بمبنى الوالي وقالو لنا ما رح يعترفو بالشهادة الليبية إذا كانت من مدرسة خاصة هون بتركيا وإذا كانت من برات تركيا فلازم يكون مرفق معا العاشر والحادي عشر ومتى ما عدلت الشهادة الجامعة بتعترف فيا 
ثامنا : بالنسبة لإعفاء السوريين من رسوم التسجيل 
يوجد نظامين بالجامعة صباحي ومسائي هي السنة نزل قرار بإعفاء الطلاب السوريين لفترة الصباحي فقط أما طلاب المسائي فما انعفو من الرسوم وبالنسبة للسكن بتكون على حساب الطالب 
رسوم الهندسات 1529 ليرة تركية للفصل الواحد
رسوم الطب 4000 ليرة تركية للفصل الواحد
طبعا صيدلة بعينتاب مافي
تاسعا : بالنسبة لفحص اليوز والسات
هون بعينتاب ما طلبو هديك السنة من الطلاب لا يوز ولا سات 
طبعا شهادة اليوز والسات هي لتقوية شهادة الطلاب يلي نسبهم ضعيفة
متل القدرات والتحصيلي لطلاب يلي عما يدرسو بالسعودية
عاشرا : طبعا بالنسبة للمعدلات المطلوبة لكل فرع
طبعا هون ما حدا بيعرف شو النسبة المطلوبة لكل فرع لأنو النسبة تحدد عن طريق عدد الطلاب المتقدمين للفرع ويتم التفاضل بينون طبعا هون طريقة التفاضل بين الطلاب بتختلف عن سوريا على حسب ما شرحولي الطلاب 
إنو مثلا طالب حط أول رغبه طب وتاني رغبه هندسة بيشوفو أولا مين حاطط رغبة الطب أول شي وبياخدو العدد المطلوب ولو ضل مقاعد بيشوفو مين حاطط الطب تاني رغبه وبيفاضلو بين الطلاب ونفس الشي للي حاطط الهندسة تاني رغبة أول شي بيشوفو يلي حاططها أول رغبه وبيفاضلو بيناتون وإذا ضل مقاعد بيشوفو مين حاططها تاني رغبه لهيك ديرو بالكم إذا فرع مو متأكدين يطلعلكم لا تحطوه بالمفاضلة أول شي لأنو بيقلل فرصة قبولكم بالجامعة
الحادي عشر : بالنسبة للطلاب يلي عايشين برات تركيا وبدن يسجلو هون بعينتاب
نحنا أنا والشباب هون رح نحدد يوم لتسجيل الطلاب يلي عايشين برات تركيا ( السعودية – الإمارات – سوريا ) وبدون أي رسوم لهيك الكل يجهز ورقو ويعدلا من السفارة لأنو خلال الأيام الجاي رح ننزل خبر مشان تسجيل الطلاب يلي عايشين برا
نصائح للطلاب : 
1- حاول تجهز ورقك من هلأ وتحاول الحصول على شهادة اللغة 
2- التسجيل طريقته كتير سهلة ما بتحتاج لا مكاتب تسجيل ولا حتى مترجمين لأنو أغلبون بيستغلو وضع الطلاب يلي ما بيعرفو لغة تركية أو ما بيعرفو طريقة التسجيل وبينصبو عليون بلاوي يعني لو عرفت مكان الكلية يلي بدك تفاضل فيا بتعرف تمشي لحالك وإذا سألت طالب سجل بالجامعة فينو يفيدك بطريقة التقديم للمفاضلة ونحنا هون كسوريين لازم نساعد بعض وأنا مني رح ساعد عقدر استطاعتي
3- إذا كان معدلك قليل لا تحط رغبات فيا اقبال كبير من الطلاب السوريين لأنو ساعتا ممكن ما يطلعلك ولا فرع
4- لا توفر أي رغبة بالمفاضلة سجل الرغبات ال 3 كلها عشان ما تتحسر بعد ما تطلع نتيجة المفاضلة
GAUN International Students Application
Form
gul3.bim.gantep.edu.tr