قامت شبكة غربتنا بزيارة محل شام للحلويات في غازي عنتاب لنتعرف أكثر عن الفعاليات السورية بالغربة وكان الحوار التالي:

|• ممكن تخبرنا عن فكرة افتتاح محل حلويات سورية في تركيا؟
أولا تواجد عدد كبير من السوريين في غازي عينتاب. ثانيا ما في محل حلويات بعنتاب ولازم السوريين لما يفتتحوا مشاريع لازم يكونوا ضمن مجالن السابق مشان يقدروا يتميزوا ونحن تخصصنا ومجالنا السابق هو الحلويات لذلك فتحنا شغل في هاد المجال.

• تركيا مشهورة بالبقلاوة والحلو برأيك الحلو الحلبي أطيب ولا التركي أو العنتابي بشكل أدق؟
غازي عينتاب المسمى الطبيعي ألها مملكة الحلويات ولكن للحلويات التركية فقط.

• هاد الشي ما شكل عندكن خوف قبل افتتاح المشروع و الاعتماد فقط على الزبون السوري؟
أنا أول ما فتحت قلت بسم الله وما اعتمدت لا على السوري ولا على التركي وما يميز الحلويات العربية هو اعتمادها على المواد الطبيعية أما التركية فتعتمد بشكل مباشر على القطر الصناعي.

• نحن أكلنا من عندكم ودقنا الطعم متل طعم حلب كيف قدرت تكون طعمة حلب وخصوصا بتغير المواد الخام يعني في فرق بين الفستق الحلبي والتركي وبين انواع السمن؟
كتير لاقينا صعوبات لبين ما وصلنا لهي النتيجة , طعمة حلب ونحن مالنا بحلب وكتير مواد أولية اختلفت معنا قبل الفستق في اختلاف بالطحين والسمن.

• سمعت انو عندكن مطبخ حلبي متكامل احكيلنا عنو وشو الي شجعكن تدخلو بهذا المجال بالإضافة للحلويات؟
آخر فترة تميزت كل محلات الحلويات بحلب انو عندا مطبخ عربي جينا نحن لهون فتحنا فرع المطبخ وبالأصل عنا مطبخ عربي بحلب ومنطالع المناسف و الكبب الحلبية و الأوزي و قريباً في مشروع جديد هو الأكلات الحلبية.

• مين بيشتري من عندكم أكتر السوريين ولا الأتراك وشو هو رأي التركي بالحلو الحلبي والطبخ الحلبي؟
أنا أول ما فتحت ما كنت معتمد عالتركي ولا 1% انو يجي يشتري من عندي بعد فترة كتير قصيرة صار عندي زبون تركي أكتر من السوري و حاليا 60% من زبايني هنن من الأتراك والحمد لله.

• ممكن تنقلي انطباع الأتراك عن الحلويات والطبخ السوري؟
أول شي يلي فادنا هو قرب غازي عنتاب من حلب يعني بتقدر تقول 70% من سكان غازي عنتاب زايرين حلب و بيعرفو شو يعني الحلويات العربية و شو يعني حلويات حلب و السمعة موجودة و ال 30% من الباقي أقربائهم زايرين حلب و دايقين حلوياتها و برجع بقلك انو نحن منتميز بالحلويات السورية انو نسبة القطر قليلة.

• ساعدكن مثلا تشابه الاسماء متل البلورية والكنافة وكتير من أنواع الحلو؟
لا لإنو ما في لا تشابه بالأسماء ولا بالطعمة يعني البقلاوة كنا نشتغلا بحلب هون ما اشتغلناها وتميزنا بطابع الحلويات العربية الحلبية بس.

• اجا شي اتراك واشتروا طبخ حلبي كبب او مناسف وشو هو انطباعن عن الموضوع؟
اي صار كتير وقلتلك انهم كتير منن زايرين حلب ودايقين الطبخ واول ما التركي بيجي لعندي وبشوف انو عندي طبخ فورا بيطلب.

• كتير من السوريين عبيشتهو عالمامونية والشعيبيات من أيام حلب وأنا اسمعت انو المامونية والشعيبيات عندك قصة؟
قصة المامونية والشعيبيات بعد ما اخدنا كتير من آراء السوريين انو كانت بحلب مربوطة بيوم الجمعة وهلأ صارت الأحد اول ما طلعنا بهالفكرة عملناها يوم الجمعة و اصر السوريين انو تصير يوم الأحد بسبب أنو العطلة الرسمية بتركيا هيه يوم الأحد.

الله يعطيكن العافية و منتمنالكن بأسم شبكة غربتنا المزيد من النجاح و التوفيق.

صور من حلويات شام

سيالات	مامونية
مبرومة	فستقلية